- Esta cita coa informática e as novas tecnoloxías, que non faltou en ningún momento ao seu encontro anual e o pasado ano recuperou a presencialidade para inscritos, retoma agora o seu espazo de acceso libre
- Terá lugar na Feira Internacional de Galicia ABANCA e contará de novo co apoio da Consellería de Política Social e Xuventude da Xunta de Galicia e con R como empresa colaboradora e patrocinadora oficial
Esta lanparty, a maior de Galicia, desenvolverase de novo no seu formato completo. Aínda que non faltou á súa cita anual en ningún momento -pois celebrouse online en 2020 e volveu facelo de forma presencial para inscritos en 2021- este ano recupera tamén a súa área de acceso libre no recinto, cuxas actividades se realizaron na pasada edición a través de internet debido a que a pandemia aínda o esixía.
Deste xeito, a XGN R Encounter incluirá este ano as súas zonas habituais nos dous pavillóns principais da Feira Internacional de Galicia ABANCA, con 10.000 metros cadrados cada un deles. A Intranet, orientada a rexistrados, permitiralles desfrutar durante os tres días dun posto con dereito a acampar e a participar en actividades exclusivas, mentres que a Extranet (área de acceso libre) ofrecerá os dous primeiros días un completo programa de propostas tanto para rexistrados como para quen visite o recinto ocasionalmente.
A Feira Internacional de Galicia ABANCA está inmersa na organización desta cita, que volverá destacar polas súas altas prestacións ao contar con 20 xigas de velocidade no recinto, grazas a R. A operadora galega é, por sexto ano consecutivo, colaboradora e patrocinadora oficial do evento, que tamén conta co apoio da Consellería de Política Social e Xuventude da Xunta de Galicia, impulsora da party.
A organización da XGN R Encounter pretende celebrar a súa edición máis atractiva e seguir así apostando por converterse na segunda lanparty de España. Un obxectivo vinculado á rede de Encounters á que R pertence a través da Fundación Euskaltel e que inclúe desde hai máis de 25 anos as parties do País Vasco: Euskal Encounter, Gipuzkoa Encounter e Araba Encounter.
Un magnífico programa
O programa que prepara a XGN R Encounter para esta edición volverá incluír propostas consolidadas con gran éxito en todas as edicións e tamén novidades que sorprenderán tanto aos participantes rexistrados na Intranet como aos visitantes que acudan á Extranet, onde a volta á presencialidade permitirá retomar actividades de gran atractivo para o público.
